Eph 1 | SWP | STEP | Eau Paulo, Iesu Keriso ena Aposotolo esau Eaubada ena nuatu debana eai, ea uriuri hetabu tataodi isi Epeso eai se miamia enadi, eo tauataiena Keriso debana eai enadi hinage:

Ephesians 1

1 Eau Paulo, Iesu Keriso ena Aposotolo esau Eaubada ena nuatu debana eai, ea uriuri hetabu tataodi isi Epeso eai se miamia enadi, eo tauataiena Keriso debana eai enadi hinage:

2 Ainauia abo au abi, eo loni, ita Tamada Eaubada arinai se laowa, eo Guiau Iesu Keriso arinai se laowa hinage.

3 Eda Guiau Iesu Keriso ena Eaubada eo Tamana, ia ta aihelahui, earua ena ainauia gamagamagari i ainauiaida galewa dimodi eai Keriso boeana eai, 4 doha hinage ia i hinerida ia boeana eai tanoubu paana sora nige se hetubu, ita abo ta hetahetabueda, eo ia matana eai abo nige edi aba hegiruda. 5 Gadosisi boeana eai i nuatunonohaidao, i gigiorieda iabom nanatunayao, Iesu Keriso debana eai, ia ena nuatu lolona debana eai. 6 Ena ainauia namanamarina aba aihelahuina ede, arinai hinage i abida Taugadosisieda boeana eai. 7 Ia arinai mauri ta aabi ia osinana debana eai, baaea abaribagigiridi ena ainauia lailai debana eai, 8 arinai sonoga gamagamagari eo nuasibasiba gamagamagari i hegoigabaedima arida eai. 9 Ena nuatuyamuyamui i heitadao, iabom ena nuatu lolona i nuatuwatai, 10 huia wa i nuatuauriyao wa, ena i lagema, ia ginauri gamagamagari abo i heoiesegaidi Keriso boeana eai, galewa ginauridi, eo tanoubu ginauridi hinage; iabom mo boeana eai.

11 Ia arinai ita hinage eda gogo ta lobaiyao, nabada ariri eai iabom ena nuatu eai, enada i nuatuauriyao, 12 ita ia ena namanamari aba‐aihelahuina ede, ita wa Keriso tausunuma‐bagunaina. 13 Riba mamohoina, emi mauri evaneliana, au ataiei, murina eai ia au sunumalau arinai, hinage Earua Tabuna, se ribahesunumaei wa, heiheinoina se tore arimiu eai. 14 Iaede ginauri lolodi enada wa, eda aba‐sunumaena i lau e ta abidi, ia ena namanamari aba‐aihelahuina ede.

15 Arinai ede eau hinage, emi sunuma Guiau Iesu boeana eai, eo emi gadosisi hetabu tataodi gamagamagari aridi eai, wasadi ea ataiedi, 16 enamiu ea laulautoidaoi nige ea lautom, egu uura aridi eai ea ribaribaemiu bena 17 eda Guiau Iesu Keriso ena Eaubada, namanamari Tamana, sonoga eo ribahemasaraha earuana abo i leawa, ia emi abanuanuatuina. 18 Nuamiu matadi i hemaradi; arinai i eogahaimiu wa sunumana abo au ita, eo hinage ia ena ginauri wasawasa ariridi wa abo au nuatui se lolo ariariri, i abidi hetabu tataodi boeadi eai, 19 eo gigibori lailai taba nige ta nonoi ita tauataiena arida eai, ena gigibori ena paipaisoa wa, iaede, 20 Keriso arinai i paisoa, ia mate eai wa i abihetoro, abo iabom nimatutuna eai i hebawa bigabiga galewa dimodi eai. 21 Ia gavamani teposaesaeariri tataodi, eo gigibori tataodi, eo tanutanuaga, eo esadi gamagamagari se ribaedi teina tanoubu eai ta mo nige’e, na tanoubu esau eai wa iaede abo i tubuma, ia mo i saetawatawaidi. 22 Ginauri gamagamagari se torelaedi ia aena ubudi eai, ia abo se hetoro ginauri gamagamagari uruurudi ede ekalesia enana, 23 ia ede ia tauna, eo ena monau, arinai ginauri gamagamagari i hemonauboriboriridi.